As mocións presentadas por BNG e PSOE e mesmo unha do PP, prosperaron todas despois duns debates que por momentos provocaron algún que outro enfrentamento sempre verbal e a pesar de que o PP votou en contra da maioría.
Unha do BNG propiciará que o concello faga unha revisión do consumo eléctrico do concello para evitar o abuso e os cobros indebidos e se estuden outras ofertas.
Outra do PSOE pedíu o apoio do pleno a que non se aplique a suba do IVE ás perruquerías que pasan de pagar o mínimo, o 8% ao 21% o que pode provocar a ruína e o peche de moitos negocios. O PSOE consultou ás 30 perruquerias de Fene e todas lles transmitiron as queixas dun sector de autónomos, con poucos empregados, a maioría mulleres e un sector con escasos beneficios, inferiores ao 13 %. O portavoz do grupo socialista non daba crédito a que o PP votase en contra.
A petición de gratuidade dos libros de texto por parte do portavoz do Bloque, Juventino Trigo ou o mantenemento dos rexistros civís e dos partidos xudiciais que presentaron por separado Bértoa e Noceda, properaron cos votos da maioría. Tamén a última iniciativa do debate, a dos socialistas denunciando a perda de poder adquisitivo das pensións que, ademais de ser moi baixas ( en Galiza máis da metade non acadan o salario mínimo interprofesional) hai que engadir o incremento doutros custes como os medicamentos, o transporte publico, luz, gas etc., segundo o voceiro socialista.
A portavoz de EU, aínda recoñecendo o interés das mocións presentadas con temas que afectan a todo o mundo, queixábase de que son asuntos nos que o Concello pouco ou nada pode facer. Reclamaba falar de cousas que atinxan aos veciños directamente.
O pleno rematou cos rogos e preguntas. Quedámonos cunha reclamación do BNG, que recolle o sentir dos veciños de Limodre demandando a colocación de balizas nas praias da parroquia diante da nova etapa de veran. Outra do PSOE que preguntou polas obras reclamadas no colexio de Sillobre. E rematamos con outro rogo de EU interesándose por unha xuntanza do Consello escolar Municipal antes de que remate o curso.
